2026 ൽ പുതിയൊരു രൂപത്തിൽ റെനോ ഡസ്റ്റർ എസ്‌യുവി ഇന്ത്യയിലേക്ക് തിരിച്ചെത്താൻ ഒരുങ്ങുകയാണ്. 2025 സെപ്റ്റംബറിൽ എസ്‌യുവിയുടെ ഉത്പാദനം ആരംഭിക്കാനാണ് സാധ്യത. ഇവിടെ, സെഗ്‌മെന്റിലെ മുൻനിരയിലുള്ള ഹ്യുണ്ടായി ക്രെറ്റ, കിയ സെൽറ്റോസ്, മാരുതി ഗ്രാൻഡ് വിറ്റാര, ടൊയോട്ട ഹൈറൈഡർ, ഹോണ്ട എലിവേറ്റ് എന്നിവയുൾപ്പെടെയുള്ള മറ്റ് ഇടത്തരം എസ്‌യുവികൾ എന്നിവയ്‌ക്കെതിരെയായിരിക്കും ഇത് മത്സരിക്കുക. അകത്തും പുറത്തും സമഗ്രമായ മാറ്റങ്ങളോടെയും ഹൈബ്രിഡ് പവർട്രെയിനോടെയും മൂന്നാം തലമുറ ഡസ്റ്റർ ആഗോള വിപണിയിൽ ഇതിനകം വെളിപ്പെടുത്തിയിട്ടുണ്ട്.
മുൻ മോഡലിനെ അപേക്ഷിച്ച്, പുതിയ റെനോ ഡസ്റ്ററിന് കൂടുതൽ ഉയർന്ന നിലവാരമുള്ളതും സുസജ്ജമായ ഇന്റീരിയർ ഉണ്ടായിരിക്കും. വയർലെസ് സ്മാർട്ട്‌ഫോൺ കണക്റ്റിവിറ്റിയുള്ള 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 6-സ്പീക്കർ അർക്കാമിസ് 3D സൗണ്ട് സിസ്റ്റം, 7 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ, രണ്ട് യുഎസ്ബി-സി പോർട്ടുകൾ തുടങ്ങിയ സവിശേഷതകൾക്കൊപ്പം അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം സ്യൂട്ടും ഏറ്റവും വലിയ അപ്‌ഗ്രേഡുകളിൽ ഒന്നായിരിക്കും.
ഇന്ത്യ-സ്പെക്ക് റെനോ ഡസ്റ്ററിൽ 156 bhp പരമാവധി പവർ ഉത്പാദിപ്പിക്കുന്ന 1.3L HR13 ടർബോചാർജ്ഡ് പെട്രോൾ എഞ്ചിൻ വാഗ്ദാനം ചെയ്യാൻ സാധ്യതയുണ്ട്. തിരഞ്ഞെടുത്ത വകഭേദങ്ങളിൽ കിഗറിന്‍റെ 1.0L ടർബോ പെട്രോൾ എഞ്ചിൻ ലഭിക്കും. അതേസമയം താഴ്ന്ന വകഭേദങ്ങളിൽ 1.5L നാച്ചുറലി ആസ്പിറേറ്റഡ് പെട്രോൾ മോട്ടോർ വന്നേക്കാം. ഡീസൽ എഞ്ചിൻ ഓഫറിൽ ഉണ്ടാകില്ല.
ട്രാൻസ്മിഷൻ ഓപ്ഷനുകളിൽ മാനുവൽ, ഓട്ടോമാറ്റിക് ഗിയർബോക്സുകൾ ഉൾപ്പെടും. ആഗോള പതിപ്പിന് സമാനമായി, ഇന്ത്യയിലേക്ക് വരുന്ന മോഡലിന് ഓൾ-വീൽ ഡ്രൈവ് സിസ്റ്റവും ഇക്കോ, ഓട്ടോ, സ്നോ, മഡ്/സാൻഡ്, ഓഫ്-റോഡ് എന്നീ ഒന്നിലധികം ഭൂപ്രദേശ മോഡുകളും ലഭിക്കാൻ സാധ്യതയുണ്ട്. പുതിയ ഡസ്റ്ററിന്റെ ഗ്രൗണ്ട് ക്ലിയറൻസ് ഏകദേശം 217 എംഎം ആയിരിക്കും.
മോഡുലാർ സിഎംഎഫ്-ബി പ്ലാറ്റ്‌ഫോമിലാണ് പുതിയ റെനോ ഡസ്റ്റർ രൂപകൽപ്പന ചെയ്തിരിക്കുന്നത്. കൂടാതെ ഡാസിയ ബിഗ്‌സ്റ്റർ എസ്‌യുവിയുമായി ചില ഡിസൈൻ ഘടകങ്ങൾ പങ്കിടുകയും ചെയ്യും . എന്നിരുന്നാലും, ഇത് അതിന്റെ യഥാർത്ഥ സിലൗറ്റും ബോക്‌സി നിലപാടും നിലനിർത്തും. ഇന്ത്യ-സ്പെക്ക് ഡസ്റ്റർ ആഗോളതലത്തിൽ ലഭ്യമായ മോഡലിൽ നിന്ന് അല്പം വ്യത്യസ്‍തമായി കാണപ്പെടും.
ആദ്യഘട്ടത്തിൽ മൂന്ന് നിര ഡസ്റ്ററും അവതരിപ്പിക്കും. 7 സീറ്റർ റെനോ ഡസ്റ്റർ ഹ്യുണ്ടായി അൽകാസർ, ടാറ്റ സഫാരി, എംജി ഹെക്ടർ പ്ലസ് എന്നിവയുമായി മത്സരിക്കും. ഡസ്റ്റർ അടിസ്ഥാനമാക്കിയുള്ള പുതിയ 5 സീറ്റർ, 7 സീറ്റർ എസ്‌യുവികൾ ഉപയോഗിച്ച് നിസ്സാൻ തങ്ങളുടെ ഉൽപ്പന്ന നിര വിപുലീകരിക്കാൻ പദ്ധതിയിടുന്നു. ഈ രണ്ട് മോഡലുകളും അവയുടെ ഡോണർ പതിപ്പുകളിൽ നിന്ന് വ്യത്യസ്തമായ ഡിസൈൻ ഭാഷ ലഭിക്കും. വരാനിരിക്കുന്ന നിസാൻ എസ്‌യുവികൾ 5/7 സീറ്റർ ഡസ്റ്ററിനേക്കാൾ കൂടുതൽ സവിശേഷതകൾ വാഗ്ദാനം ചെയ്യുമെന്ന് റിപ്പോർട്ടുകൾ സൂചിപ്പിക്കുന്നു.
